ਸੈਲਾਨੀ ਦੋ ਕਿਸਮ ਦੇ ਹੁੰਦੇ ਹਨ: ਇੱਕ ਉਹ ਜਿਹੜੇ ਘੁਮੱਕੜੀ ਦੇ ਚਾਅ ਵਿਚ ਘਰੋਂ ਨਿਕਲਦੇ ਹਨ, ਤੇ ਦੂਜੇ ਉਹ ਜੋ ਦੁਨੀਆ ਨੂੰ ਵੇਖਣ ਸਮਝਣ ਦੀ ਜਿਗਿਆਸਾ ਦੇ ਡੰਗੇ ਵਾਰ ਵਾਰ ਨਵੀਆਂ ਥਾਂਵਾਂ, ਨਵੀਆਂ ਮੰਜ਼ਲਾਂ ਵਲ ਕੂਚ ਕਰਦੇ ਹਨ। ਜਸ ਮੰਡ ਇਨ੍ਹਾਂ ਦੋਹਾਂ ਕਿਸਮਾਂ ਦੀ ਸੈਲਾਨੀ ਬਿਰਤੀ ਦਾ ਸੁਮੇਲ ਹੈ, ਜਿਸ ਅੰਦਰ ਚਾਅ ਵੀ ਅਮੁੱਕਵਾਂ ਹੈ, ਜਿਗਿਆਸਾ ਵੀ। ਉਹ ਥਾਂਵਾਂ, ਲੋਕਾਂ ਨੂੰ ਸਿਰਫ ਦੇਖਦਾ ਹੀ ਨਹੀਂ, ਫਰੋਲਦਾ ਵੀ ਹੈ। ਅਤੇ ਸਭ ਤੋਂ ਅਹਿਮ ਗੱਲ ਕਿ ਆਪਣੇ ਦੇਖੇ-ਸੁਣੇ ਨੂੰ, ਆਪਣੀ ਫਰੋਲਾ-ਫਰਾਲੀ ਨੂੰ ਬਹੁਤ ਰੋਚਕ ਸ਼ਬਦਾਂ ਵਿਚ ਹੋਰਨਾਂ ਨਾਲ ਸਾਂਝਿਆ ਕਰਨ ਦਾ ਵੱਲ ਵੀ ਜਾਣਦਾ ਹੈ। ਆਪਣੀਆਂ ਦਿਲਚਸਪ ਫੇਰੀਆਂ ਉੱਤੇ ਅਧਾਰਤ ਦੋ ਕਿਤਾਬਾਂ ਉਹ ਪਹਿਲਾਂ ਹੀ ਪੰਜਾਬੀ ਪਾਠਕਾਂ ਦੀ ਝੋਲੀ ਪਾ ਚੁੱਕਾ ਹੈ, ਹਥਲੀ ਪੁਸਤਕ ਰਾਹੀਂ ਉਹ ਆਪਣੇ ਯਾਤਰਾ ਬਿਰਤਾਂਤਾਂ ਦੀ ਲੜੀ ਨੂੰ ਅੱਗੇ ਤੋਰਦਾ ਹੈ। ਅਜੰਤਾ-ਐਲੋਰਾ ਵਰਗੇ ਮਨੁੱਖ ਸਿਰਜੇ ਸ਼ਾਹਕਾਰਾਂ ਤੋਂ ਲੈ ਕੇ ਉੱਚੇ ਪਰਬਤਾਂ ਦੀਆਂ ਅਣ-ਗਾਹੀਆਂ ਵਾਦੀਆਂ ਅਤੇ ਚੋਟੀਆਂ ਨਾਲ ਪਛਾਣ ਕਰਾਂਦੀ ਹੱਥਲੀ ਪੁਸਤਕ `ਅਜਬ ਅਜੂਬੇ ਕੋਰੀ ਕੁਦਰਤ` ਸਮਰੱਥ ਯਾਤਰਾ-ਬਿਰਤਾਂਤਕ ਜਸ ਮੰਡ ਦੀ ਪੰਜਾਬੀ ਸਾਹਿਤ ਨੂੰ ਸੱਜਰੀ ਦੇਣ ਹੈ।

-ਸੁਕੀਰਤ